الأربعاء، 6 يوليو، 2011

حد الله ما بينى وبينك يا حكومه

حد الله ما بينى وبينك يا حكومه
يا حكومه 30 سنه !!!
يا حكومه بلد منهوبه ومحرومه 
يوم 25!!!!!لما  طلبت التغيير
وقلت ثوره حره  بالتحرير
 قلتى على مجنونه
أخدت اهلى وجيراتى وعزوتى وخلانى
وميلينا الميدان قبطى وليبرالى واخوانى
ورسمنا لوحه  عشق فصفحه تاريخك
وقولنا للظلم لاء وحمانا جيشك
وبدم الشهدا الاحرار خلعنا  رئيسك 
وبدمهم  حبسنا العادلى حبيبك
وبدمهم ....
سجنا أسم النبى حرصه وريثك
آه يا حكومه الداخليه
راح فين اللى دهسنى بعربيه 
وفينه اللى فرغ فعيونى
طلقه وخرطوشه بندقيه  
ويا ترى اخد اوامره منك ؟
ولا دى برضوه  بلطجيه ؟

آه يا حكومه مطاطيه 
لكل الخونه  والحراميه 
آه يا حكومه العسكر 
والكل على اصله بيظهر 
يا مشيرأسأل النائب العام ؟
هو دم الشهيد يساوى كام ؟
ومين اللى هيدفع ؟؟ 
مبارك ولا رجالته ولا الست سوزان ؟
ويا ترى التمن هيبقى دم واللا مال ؟
يا حكومه التغيير ...أسفه!! يا حكومه المشير 
أنا أتولدت هنا على أسفلت التحرير 
وبعد ولادتى سمعونى صوت التكبير 
والنفس دخل عزه والكرامه خرجت زفير 
وأنا كاالصعايده ...ما بفرط يوم ف طارى 
ومخى مقفل وما بفهم غير ان الدم بالدم
لجل ما طفى نارك ونارى 
ويدى على الزناد
لجل ما اجيب حق الولاد
وما بينفع معاى الملاغيه 
ولا تشترينى بشقه وعربيه 
والولد حدانا مبنقبل فيه الديه 
ولا خشمى بيتكتم بلقمه ....
أو حتى فخده مشويه

وانا م السوايسه .....من ميدان الاربعين 
شايلين كفنا وف طريق الشهاده ماشيين
ونبعتلك بدل الشهيد ألف وألفين 
وان كان على الرصاص والقنابل 
احنا من زمان متعودين وصامدين 
نفكرك بنفسنا ؟؟؟ 
احنا السوايسه الجامدين
احنا ولاد سبعه وستين 
وسقيناكى النصر ف تلاته وسبعين 
احنا أهالى الشهدا والمصابين 
وبدل ما تكرمينا ...
ورتينا يوم زى الطين 
يوم ما برئتى القتله والسفاحين 
والنهارده جايه تقوليلى المسامح كريم؟ 
وبتساومينى ابيع الدم بقرشين؟؟
طب !!! أنا مش كريم !!!
ووحياه دم أخواتى .....
لوراكى وراكى 
وهدور على حقى ليوم الدين 

انا من كل شارع وحاره وزقاق فى مصر 
واتربيت على حب الشهاده وحب النصر 
وبقولهالك وكلى عز وفخر 
لجل الحريه انا هنحت ف الصخر 
وإن كان على دمى وجرحى ؟؟
وإن كان على قهره امى ؟؟ 
وإن كان على حقى ؟؟
وفلوسى المسروقه  وآثارى المنهوبه؟
فحد الله ما بينى وبينك يا حكومه




شيماء الجمال


ليست هناك تعليقات: