الجمعة، 6 فبراير 2009

الرسالة الثانيه

رسالتى الثانيه إلى كل إمراءه
الحرمه اللى اعرفها بتغسل رجل جوزها بالميه والملح وبدون تضرر..........وبتبقى مبسوطه
الحرمه اللى اعرفها لازم تلاقى بدله رقص فى دولابها ......علشان جوزها ميبصش بره
الحرمه اللى أعرفها بتهتم بلبس البيت أكتر بكتير من الخروج.......مش مهم حد يشوفها حلوه إلا جوزها
الحرمه اللى أعرفها ممكن تنسى تحط روج وهى خارجه.........بس مش ممكن تنسى تتمكيج قبل ما جوزها يجى
الحرمه اللى أعرفها جوه حجرتها عالمه (رقاصه يعنى)
وبره البيت شيخه سجاده......وبضدها تتمايز الأشياء
الحرمه اللى أعرفها فى العادى تحت رجلين جوزها.....وفى الأزمات تلاقيها وقفه فى ظهره ...أصلها الظهر والسند الحقيقى لجوزها راجل وقت اللازوم
الحرمه اللى أعرفها مصروف ولادها صغير......أصلهم بيفطروا قبل المدرسه وبياخدوا معاهم سندوتشات....أم عندها وقت لولادها
الحرمه اللى اعرفها ثقافتها من ثقافه أولادها.......اصلها بتذاكرلهم وبتذاكر معاهم
الحرمه اللى أعرفها مهتمه قوى بالموضه وأحدث التقليعات....بتحاول تحافظ على جوزها
الحرمه اللى أعرفها حضنها يلم الدنيا وما فيها.......ست بمعنى الكلمه
الحرمه اللى أعرفها بتعرف تكون أنثى أنثى......وموزه لو حبت
الحرمه اللى أعرفها شبه أمينه مرات سي السيد أحيانا وهيفاء وهبى أحيانا
والباقيه تأتى
وسنوافيكم بالباقيه

الاثنين، 2 فبراير 2009

رسالة الى امراءه

رسالتى موجهه إلى كل إمراءه تعرف معنى كلمه حرمه وهو لفظ بتنا نقوله على كل أنثى مازالت محتفظه بفطرتها التى فطرها الله عليها
الحرمه التى تعتز بأنوثتها وتقدر ما حباها بها اللله من نعمه الانوثه
والحرمه حرمه اى كانت دينتها فهنا لا نفرق بين مسلمه أو بوذيه أو يهوديه أو مسيحيه .........إلخ
الحرمه التى أعرفها هى شبيه لطنط سا ميه جارتنا فى أواخر عمرها وتقولك (أنا لا أعرف أروح ولا أجى من غير الحاج دا أنا لو نزلت من غيره أتوه) وشبهها لما سافر الحج لأول مره الحج من غيرها وقعدت وسط الجموع تبكى وتقول عمرى ما بت ليله واحده من غيره إزاى النهارده هيجيلى نوم 40 سنه عمرنا ما أفترقنا يوم يارب يهون عليا , وتلاقى الجموع يهدوها ويهونوا عليها وهى دمعتها منشفتش إلا بعد وصول الحاج
الحرمه اللى أعرفها مينفعش تشتغل لأنها مش ممكن تتزنق فى المواصلات ومش ممكن يكون ليها زميل بيقعد معها أكتر ما بيقعد معها جوزها فى البيت ولأن الفلوس مش كل حاجه والأهم عندها بيتها وولاده وراحه وسعاده جوزها
الحرمه اللى أعرفها بترضى بالقليل مادامت الصحه والستر ملايانين بيتها
الحرمه اللى أعرفها بتطبخ حلو قوى وبتعرف تعمل محاشى وممبار وفته وولادها مبيكلوش تيك أوى أبدا
الحرمه اللى أعرفها معندهاش أزمه طوابير العيش علشان بتخبز فى بيتها وعلى فكره بتعمل الرز باللبن أحلى من صابر والمالكى
الحرمه اللى أعرفها أول ما جوزها يحط المفتاح فى الباب بتجرى بسرعه تبص فى المرايه وتعدل شعرها وتقول للعيال كله يعدل نفسه أبوكوا جيه
الحرمه اللى أعرفها لما تحب تخرج بتستأذن قبلها بأسبوع وتحاول تعمل مقدمات ولما يتقلاها لاء بتسكت...........تخيل
الحرمه اللى أعرفها بتصحى أول حد فى البيت وبتنام آخر حد فى البيت ...... يا سبحان الله
الحرمه اللى أعرفها بتعرف ولادها أول ما يبدأو يكدبوا .....أصلاها قاعده معاهم علطول حفظاهم يعنى
الحرمه اللى أعرفها معندهاش فلبينيه وهى اللى بتحمى وتأكل وتنظف وبتدلع وبتذاكر للعيال وتسمعلهم وبتعملهم شاى بلبن مش نسكافيه
والباقيه تأتى
سنوافيكم بباقى الرساله
شيماء الجمال