الاثنين، 26 يوليو 2010

كنت فين؟؟؟


كنت فين فضلت كتير بدور عليك
كنت فين وانا روحى كانت هايمه حواليك
كنت فين وانا حضنى مشتاق لضمه ايديك
كنت فين وانا هنا بهاتى وادور عليك
كنت فين وقلبى مخبى حبه كله لحد ما يلاقيك
كنت فين وانا دمعى نازل من شوقى ليك
كنت فين وانا وحيده والدنيا كلها بين ايديك
كنت فين تعبت من سؤالى عليك
كنت فين وانا ما كنت بحلم الا بيك
كنت فين
ولما لقيتك قلت ده يوم محمود
يوم هفرح فيه وافرح كل الوجود
وهعلن للى رايح واللى جاى وكل مولود
انى بحبك وان حبى صفته الخلود
وهولع الشموع والانانى وأقدملك كل الورود
وهشكر ربى وهدعيله وهكتر م السجود
ده يوم من عمرى ده احلى يوم ده يوم موعود
ومش هخاف ولا هدارى وبايدى هكسر كل الحدود
وعيونى فضحتنى وبسمه شفايفى واحمرت الخدود
لما صرخ حبك واعلن انه هنا اتخلق حى وموجود
وان ايدى فى ايدك نقدر نعبر ونعدى ونحطم كل السدود
دنيتى ضحكت تانى, ابعد يارب عنى كل حسود
وفتح لينا كل سكه وما تخلى فيه باب مسدود
وهقولك من تانى ....
كنت محتاج كل مشاعرى وحنانى
محتاج احتويك فى كل اركانى
محتاج شقاوتى وعقلى وجنانى
محتاج تعيش فى مكانى وزمانى
محتاج تسمع لغتى و كلامى
محتاج تعزف على اوتارى وألحانى
محتاج تكون دم وريدى وشريانى
محتاج تصحى وتنام بين أحضانى
محتاج لما تنادينى علطول تلقانى
وأوعدك ...أنى أفضل أسعدك
وعن حضنى عمرى ما أبعدك
وأملى عينك وأفضل أعجبك
وأوعدك ...
أنه من الصعب ومن المحال
معايا يتبدل الحال ويبقى غير الحال
أو اتشغل عنك بالطبيخ والغسيل والعيال
أو اضايقك باللى جرى واللى حصل واللى قيل وأتقال
ومعايا حياتك هتبقى عال العال
والحب عندى أنت ,مش نفوذ ومال
أصلى ببساطه شيماء الجمال

شيماء الجمال






الأربعاء، 14 يوليو 2010

إبكى


إبكى
إبكى يا قلبى وفجر كل الدموع
أصرخ وقول انا مجروح موجوع
وطفى بدمعك الغالى كل الشموع
ذنبك انك حبيت والحب بقى شئ ممنوع
والغدر والقسوه بقت عادى وبقى كل شئ مشروع
من كتر الجفا قسيت وبقيت مجروح ممزوع
إبكى يا قلبى . إبكى وطلع من جوه تنهيده
وقول للدنيا انت ليه كده بقيتى عنيده؟؟؟
وأسألها لو جاوبت عليك أسألها وعنيها فى عينيك
أسألها ليه على القفا بتدينى وجروحها معلمه بجبينى
هو انا اللى قالوا عليها ...أن الشقى مكتوب ليها ؟؟؟؟
ولا أنا اللى شالت كل الحرمان والهم وحطته فوقيها ؟؟؟
أنا حلمت واتمنيت وبالقليل والله رضيت
وطريق العيب والغلط عمرى ما فكرت فيه ولا عديت
أنا صبرت واستنيت وقسيت ووفيت وما لقيت
أيوه أنا .....
فكرها يا قبلى لو ناسيه, فكرها وقولها ما تبقاش قاسيه
فكرها انى رغم الوحده لسه مكانى ساكنه كده وراسيه
قولها انى بحلم بالامان ...اللى اتحرمت منه من زمان
قولها ان الحب شئ مشروع وانى مبطلبش شئ ممنوع
وقولها تبعد كلابها عنى ...وتقولهم مالهم ومالى
أنا ببعد عنهم وبخلينى دايما كده فى حالى
وهى سايباهم يطمعوا فى ويلهثوا دايما قدامى
ماهى لو كانت اديتنى أسد !!!كانت الكلاب تبعد وتنسانى
بس فى اخر الزمان باتت الاسود وبقت خرفان
وبقيت متعرفش تامر من لؤى من منى من عبد الله من تنتان
بطلت الاسود تاكل لحمه من بعد ما اتكحلت وأكلت اللبان

شيماء الجمال