الأربعاء، 9 مارس، 2011

فتشت عنك

لفيت أدور عليك فى كل الكون 
فتشت ف كل صنف وجنس ولون
قابلت الأبله  والعاقل والمجنون 
فيهم اللى عمل عنتر واللى عمل شمشون 
واللى افتكر ان الرجوله تساوى كام مليون 
واللى افتكرته طيب فجأه قلب فرعون 
واللى فاهم انه كل ست عنده بجون 
واللى وعدنى ان الصعب عشانى يهون 
واللى قالى انا ابن حلال طيب وحنون 
واللى قال كفايه علينا قله وحصيره وكانون 
فتشت عنك انت ...ايوه انت ..مش لاقياك 
لا أنت هذا ولا ذاك ولا شايفه سواك 
لقيتك جوايا انا ..لا انت هنا ولا انت هناك 
ولا انت شايفنى ...ولا لى وجود معاك 
ولا قادره ابعد عنك ...ولا قادره انسى هواك
ولا انا من حريمك ...ولا واحده من رعاياك 
قلت طب اقرب منك ...واحاول افهم عنك 
واقف هناك كده جنبك ...
يمكن انول قربك ...
او حد يعرفنا فيقول اسمى واسمك 
او بسمه  او همسه منى تيجى فى وشك 
او تطير شعره منى وغلطه تيجى فى شعرك 
انا قلت تلكيكه والسلام ...
يمكن السلام يقلب كلام ووئام ...
يعنى همسه فكلمه فلقاء ف غرام ...
اتشجعت وقلت لنفسى طب كلميه 
حاوريه اشغليه او حتى خانقيه 
ما هو مش شايفنى خالص حواليه 
واتقابلنا فى الزحام والتقينا بدون سلام
الأيدين كانت بتهمس والعيون بتقول كلام 
قلت بس هس هو ده ...وبدأ الغرام 
وهما يومين بعد ما بدات اكتب قصه حبى وحبك 
لقيتك هيمان وواحده غيرى سبقتنى لقلبك 
قلت ياربى سنين عمرى ضاعوا منى 
وانا كنت بفتش عنك ؟؟؟
روح يا شيخ ياريتنى ماحبيتك  
ولا كنت لقيتك ...ولا ف مخى حطيتك 
ولا غالى وحبيبى سميتك 
وكان ممكن بعمرى فديتك
بس إن كانت زيى بتحبك ؟؟؟؟
روح ....الله يعمر بيتها وبيتك 


شيماء الجمال

هناك تعليقان (2):

noura يقول...

جميلة جدا جدا جدا يا شيماء,حاسة إنها بتتكلم عني وعن ناس كتير,احببت مناصرتك لهذا النوع من المقالات.

تحياتي من قلب
نورا.....

غير معرف يقول...

تستهلى