الأربعاء، 15 ديسمبر 2010

يا شعب يا اهبل يا عبيط

الزمر طيط ..والطبل طيط ..يا شعب يا اهبل يا عبيط
حرموا اللقمه على جوفك ..والغلا طال حتى صوتك
صوتك اللى بتديه.. لابن التيييت.. وابن اللى بالك فيه 
فرصه عظيمه.. من بلد كريمه ..الصوت وصل لمتين جنيه
فى 2011 مجلسنا مجلس فخر وعز
مجلسنا فيه الغالى وفيه كمان ابن الوز
مجلسنا منور بسرور ...اللى هيلغى الدستور
يلا معانا نحيا الهليبه ...ونبارك لابن اللعيبه
اللى ماخدشى ولا صوت ...وفاز بالسنجه والنبوت
يلا نسقف للباشا الوزير...اللى مبلطج فيها وشغال تزوير 
يلا نبارك للريس ...على اللى هيورث ويهيص
والعزبه بقت عزبتهم والتركه ما هى م الاول بتاعتهم
واحنا كمان فوق البيعه ....والخيبه باقت بنويبه 
والشعب فرحان ومزقطط...وكله بيرقص يطنطط
واوعدكم  بكره نولول و نعيط
مبروك للحزن الوطنى ...وفداه امى وأبويا وابنى 
ضربو الاعور على عينه ...قال ما انا معمى طول عمرى يا بيه
والجوع والذل أنا خدت عليه ...والفساد وصبرت عليه 
وقلمى و قصفته وحرمت ابريه ...
وصوتى وزورته ...ولسانى وقطعته 
وملكى وخصخصته...وغازى وصدرته 
وتاريخى وحرفته...وحلمى وأجهضته
و ده آخر زادى للريس وابنه أنا بهديه 
والطبل طيط والزمر طيط يا شعبل يا اهبل يا عبيط 


شيماء الجمال

هناك 9 تعليقات:

مدونة رحلة حياه يقول...

السلام عليكم
كلامك معبر
بس احنا من شعب اهبل ولا شعب عبيط

غير معرف يقول...

سؤال بسيط ياست هانم يابنت الجمال
من أي شعب حضرتك علشان أعرف أخاطبك في رسالتي القادمة بما يليق بجنابك ؟
فلو تصادف وطلعتي من شعب تاني فبالمناسبة سيكون ردي عليكي قاسي
ولو طلعتي مصرية فسيكون ردي عليكي أشد قسوة
لأن اللي مالوش خير في ناسه وبلده مالوش غير أنه يدفن نفسه أحسن
لأن ياهانم أهاتك وألامك اللي بتتنهدي بيها كرهاّ في وطنك اللي من غيرك عايش ومستمر مرفوع الرأس بناسه وحكامه وصدقيني لو حكامنا قدموا صوابعهم شمع برضه حتعترضي عليهم لأنه واضح أنها طبيعة بشرية في حضرتك اللي كانوا بيتسموا في صدر الاسلام بالرافضة بالمناسبة سارسل لحضرتك رسالة علي الايميل اوضح فيها للعبط امثالك ان اللي بيحصل النهارده في مصر لا ذنب للنظام الحالي فيها وسلميلي علي العباطة خالتك والله هو الهادي .
hagenmisr.blogspot.com

شيماء الجمال يقول...

الاستاذ الفاضل الشرقاوى
اولا احب أن أرحب بك فى مدونتى المتواضعه واقول انه لشرف لى مروركم الكريم
ثانيا بالنسبه للنقد فاهلا به ومرحبا ما كان موضوعيا ودون إهانه أو تجريج
ثالثا أنا مصريه شرقاويه أصيله من طين مصر وجدودى من فلاحيها وأبى من جنود 67 و73 من رجال القوات المسلحه ,وأنا ما أهنت مصر ولا المصريين إنما سخطت على نظام ما فيها وهذا شانى به شأن كل المصريين المخلصين المحبين لمصر
رابعا بالنسبه لوطنيتى ومدى حبى لمصر فيا أستاذى الكريم أنا منذ ان كنت بإتحاد طلبه الجامعات وأنا مشغوله بقضايا وهموم بلدى , أنا وزملائى مرارا وتكرارا من نظفنا شوارعها وزرعناها بالاشجار والنخيل وتقدر حضرتك تعمل سرش على فى جوجل وتعرف وبالنسبه لرأى حضتك فى النظام فهى وجهه نظرك الخاصه وأنا ضدها والاختلاف فى الرأى لا يفسد للرأى قضيه وكلامى هنا موجهه لاأولو الالباب فقط
وبالنسبه للرد على اهانتك لى ولخالتى الفاضله فأنا سامتثل لقول الله تعالى حينما قال فى كتابه ( وإذا خاطبهم الجاهلون قالوا سلاما ) فإليك يا سيدى أقول سلاما سلاما
تحياتى
شيماء الجمال

غير معرف يقول...

هو اللى معتض ده معترض على ايه وعلى مين, كفايه بقى الله يحرقكم مليتوا البلد وتسلم ايدك شيماء

غير معرف يقول...

اللى كتب الكلام ده واحد من ضمن خدام الحزب المسعور ومسمى نفسه شرقاوى

جميله المصرى يقول...

السلام عليكم

كلماتك جميله اوووى يا شيماء

والله هو ده حالنا فعلا

بس تعرفى ان هو ده الى كان المتوقع ان المجلس ميبقاش فيه اى معارضه

ربنا يستر من الى جاى

اللهم نجنا من القوم الظالمين

تسلم ايدك يا شيماء

دمتى بكل خير

اختك جميله

شيماء الجمال يقول...

جميله يا جميله الجميلات
شكرا حبيبتى وصدقينى إن نصر الله لآت ولو كره الكافرون , وأحنا لن نستسلم ولن نخضع ابدا ولسه فيه أمل ما دام فيه ناس زيك كتير , ربنا يكرمك حبيبتى وأسعدتينى بتعليقك
تحياتى
شيماء الجمال

غير معرف يقول...

والله يا شيماء انتى زودتيها المره ديه بس بصراحه عندك حق انا حزب وطنى وانتى عارفه بس المره ديه انا معاكى التزوير كان مهزله اما بالنسبه للشخص الشرقاوى ده ابو رد قاسى فانتى ردتيتى عليه كويس بس نسيتى تقوليله ان كلامه ده مش حياخد عليه كرسى فى البرلمان الجاى ولا الحزب مثلا ممكن يجيبه وبعدين هو انت يا شرقاوى افندى كنت فين ساعه الانتخابات كنت نايم ولا كنت فى غيبوبه ولا ايه بطل نفاق يا اخى جتك نيله الانتخابات كانت مهزله ازاى برلمان من غير معارضه ازاى كل التزوير ده وبعدين ليه كل الوزراء دول يدخلو ا المجلس المره ديه عندك حقك بجد

شيماء الجمال يقول...

شريف عز طبعا عرفت تعليقك من غير امضاء وده لانك الوحيد اللى حزب وطنى بعرفه فى تاريخى , اهلا بك شريف دوما ومبروك ليك وللحزب الوطنى ومبسوطه انك اخيرا قلت كفايه للتزوير
تحياتى
شيماء الجمال