السبت، 15 أغسطس، 2009

أشهر الجمل بين الرجل والمرأه منذ التعارف

موضوع شيق أن تتحدث فيما يخص الرجل والمرأه وما بينهما وماده غنيه جدا ومثيره , الآن دعونا نذكر اشهر العبارات والجمل المتعارف عليها بين الرجل والمرأه من بدايه التعارف الى لحظه الاعتراف بالحب الى الزواج الى ما بعد الزواج والآن سنذكر العبارات الشهيره وقت بدايه التعارف وقبل التصريح المباشر بالحب
فبدايه التعارف تجد كل طرف يحاول إظهار الاهتمام الشديد بالاخر حتى لو كان اهتمام زائف وهو بالغالب يكون كذلك كما يحاول كل طرف اظهار محاسنه المستعاره للاخر والتركيز عليها واظهار المثاليه فى كل شئ ومحاوله اقناع كل منهم للار ان بينهم توافق شديد وكبير فى كل الاشياء ولهذه المرحله عباراتها الشهيره فتجد الحوار كالتالى ....
الفتاه: أنت برجك أيه؟
الشاب: برج العقرب (مثلا)
الفتاه: بجد؟ تعرف انه متوافق تماما مع برجى ؟
الشاب: وانتى برجك أيه؟
الفتاه: الجوزاء
علما بأن البرجين غير متوافقين وقد لا يكون الاثنين لا يعلمون اصلا اى شئ عن الابراج
الشاب: أكلتى كويس؟
الفتاه: لاء والله ماليش نفس خالص ..مش عارفه ليه
الشاب: لو سمحتى تاكلى كويس ولو ما كلتيش هزعل منك جدا
الفتاه: طيب انت كمان لازم تاكل كويس ولو ما كلتش مش هاكل خالص لحد ما اموت من الجوع
طبعا كلا منهم بيقول الكلام ده وهو بطنه هتفرقع من الاكل والحش طول النهار
وتجد الفتاه ليلا على الهاتف تساله
الفتاه: أنت هتنام
الشاب: ايوه
الفتاه: طيب خلى بالك من نفسك
ومش عارفه يخلى باله من نفسه ازاى وهو نايم؟ وعلى سريره وفى بيته ؟ يعنى فى منتهى الامان بس برضوه كلام فى منتهى الهبل
الشاب: أنتى لابسه ايه دلوقتى؟
الفتاه: بيبى دول اسود
الشاب: واوووووووووو
طبعا هى بتقول كده وهى بالبيجامه الكستور وشعرها منكوش
الفتاه: لا اله الا الله
الشاب محمد رسول الله
وعندما ياتى الصباح لابد من عمل مكالمه تليفونيه من على السرير تحاول الفتاه ترقيق صوتها فى هذه المكالمه بقدر الامكان وخفت الصوت الى ادنى مستوياته وتبدأ الحوار
الفتاه: صباح الخير
الشاب: صباح العسل
الفتاه: أنا حلمت بيك امبارح
الشاب: وأنا كمان
وتجد من العبارات الشهيره للرجل ايضا
مينفعش اللبس ده....مفيش تاخير بره البيت.....كلمينى اول ما توصلى ....أنتى اول حب فى حياتى....عرفت بنات كتير بس ما حبيت غيرك....لو لفيتى الدنيا بحالها مش هتلاقى حد يحبك قدى.....نفسى يتقفل علينا باب واحد....يااااااااااااااه أمتى بقى نتجوز...نفسى أشوف ابن لى منك وياخد حنيتك.....عارفه شكلك احلى كتير من غير مكياج
وأمن اشهر العبارات للفتاه ايضا
أنت اول تجربه فى حياتى.....أنا جالى عريس النهارده واهلى ضاغطين على....أنا بحب الورد والشموع قوى قوى....أنا بحب الاطفال قوى ....نفسى اخلف ولد يكون شبهك واسميه على اسمك.....نفسى أعملك الأكل بايدى وأكلك بأيدى...أنت عارف أن مواصفاتك هى كل ماصفات فتى أحلامى؟
ها هى ما اتذكرها الان والموضوع مفتوح من عنده المزيد فليزيدنا
ارجو من الجميع ان يضيف ما هى اشهر العبارات المتكرره بين الرجل والمراه
شيماء الجمال

هناك 12 تعليقًا:

خالد الاسكندرانى يقول...

I love it , funny and interesting....

elsha3er يقول...

السلام عليكم

اولا كل سنة وحضرتك طيبة ثانيا والله مش كل الناس للى بتعمل كدة فى ناس بتتصرف على طبيعتها فى الحب


تحياتى

احمد الشاعر

ياسر سليم يقول...

بسم الله ماشاء الله

شكلك قريتى فى الأبراج وعرفتى كمان ان العقرب مش متوافق مع الجوزاء

وانتى من فترة قصيرة كنتى بتقولى ما عندكيش فكرة عن الأبراج

هو ده برج الجوزاء .. برج شغوف بالمعرفة والإطلاع

شيماء الجمال يقول...

ياسر سليم
دايما بتعجبنى وبتشدنى كلماتك الذكيه وملاحظاتك الدقيقه
أشكرك للتواصل معى دائما تحياتى

احمد على نصار يقول...

موضوع جميل وبيحصل كتير طبعا ، وبتلاقى كل واحد فيهم لابس ماسم بيتدارى جواه علشان يبان قدام التانى وكأنه ملاك بجناحين ، لكن بمرور الوقت بتبان الحقيقة
دى اول زيارة
تحياتى

شيماء الجمال يقول...

احمد على نصار
مرحبا بزيارتك الكريمه واتمنى ان لا تكون الاخيره وشرفت المدونه بتعليقك
تحياتى
شيماء الجمال

mahasen saber يقول...

شيماء رصدتى وافدتى وقلتى الغالب فى العبارات فعلا مع ان متقلش ليا عبارات مشابهه قبل كدا
نقول ايه بئا


المهم ايام مباركه عليكى يا شيما ورمضان كريم على كل من تحبين يا حبيبتى

شيماء الجمال يقول...

حبيبتى محاسن
كل سنه وانتى طيبه يا قمر وان شاء الله لو ما تقلكيش الكلام ده قبل كده بكره تسمعيه كتير كتير كتير
وابقى افتكرينى وقتها
تحياتى
شيماء الجمال

كراميلا يقول...

المشكله مش فى الكلام
المشكله اننا لسه
معرفناش يعنى ايه حب

الحب الصادق مش بيتعبر عنه
بكلام وأكيد عارفين
بيتعبر عنه ازاى

دمتى :)

غير معرف يقول...

من اشهر العبارات عندما تقولها الست للرجل عند لحظات الفراق انا بسيبك عشان مصلحتك او انا اسيبك عشان تكون سعيد وهى تلاقيها مظبطه واحد تانى ويمكن تكون بتقول الكلام ده فى سرعه وعجله من امرها عشان عندها ميعاد من التانى بعد شويه وعلى العموم العبارات الشهيره لا تنتهى ولا ليها اول ولا اخر

noura يقول...

حلو اوى الموضوع دا يا شيماء,وفعلا معظم او كل الجمل اللى قلتيها بتتقال فى الواقع,بس انا نفسى اعرف حاجة(لية لما بيكون فى طرف من الطرفين مش عاوز يكمل مع الطرف الثانى,لية بقى بيتمادى فى الكلام دا)!!!!!

تحياتى

شيماء الجمال يقول...

نورا الجميله , اللى بيكمل علاقه مع حد هو مقرر سالفا انها هتنتهى يبقى بيلعب بمشاعر الناس وشخص عديم التربيه ودول كتير قوى للاسف وملوا البلد , وهنا لابد من اننا نحكم عقلنا ونستفتى قلوبنا
تحياتى يا احلى نورا وارجوكى اقرأى مقالى بعنوان بنات الناس مش لعبه

شيماء الجمال