أحنا الثورجيه ولادك ....
صبرنا عشانك التلاتين سنه الماضيه
صبرنا عشان ...
خوفونا وعمونا واعتقلونا وسحلونا وقيدونا
بس لما احتجتينا....
الكل كبار وصغار جالك هنا ف ثانيه
عمونا بالقنابل ...بعد ما صوتنا قوى الحناجر
ورمونا بالرصاص ...قولنا عشانك مش هنخاف
ولحد ما ندخل قبورنا هنردد الهتاف
ايوه احنا فداكى يا غاليه
قتلوا اخويا وضربوا ابويا ...
ودم بناتك مش خساره فيكى ...
دمهم ليكى كان دروع واقيه
أيوه احنا ولادك وبناتك
ودم الشهدا فدا ترابك
أتحدونا وقالوا شباب سيس ..
وقالولنا ان نجاحنا ده كلام تهجيص ...
بس بعد ما طردنا الندل والخسيس....
والمعارض والمؤيد هنا بيهيص ..
جينا نقولك يا بلادى ...شعبنا كله فداكى
واوعوا تنسوا دم الشهدا
فقلوبنا النهارده وبكره
واوعوا م النهارده تخافوا
بعد ما الامم كلها شافوا
ان المصرى علشان حقه
بيضحى بحياته
عايزه الكل يردد الهتاف
الله اكبر الله اكبر عليكى يا غاليه
الله اكبر الله اكبر عليكى يا نبض الدنيا
شيماء الجمال
هناك 3 تعليقات:
شيماء يابنت العم
كلماتك الرائعة اللي طالعة من قلبك أوحت لي بهذه السطور اللي اخذتها من سطورك .
الله أكبر .. الله أكبر .. يابلادي .. با بلد بوي وأهلي وناسي الغاليين .. اللي صبروا علشانك من السنين تلاتين .. ولما احتجتيلنا كسرنا قيودهم الهشة .. وجينالك عالطول من القرية للتحرير ماشيين .. وللاسف ومن خوفهم يومها رمونا احنا اولادك وبناتك بالرصاص .. قولنا في حبك ابد الدهر مش هنخاف .. ولحد اخر قطرة دم هنردد الهتاف " ايوه احنا فداكى " يابلدي وبلد بوي وأهلي وناسي الغاليين .. أتحدونا وقالوا شباب فييييس بوك .. وان نجاحنا في دا اليوم المعروف بـ 25 يناير 2011م فيه شكوك .. عشان كده اتحدوهم ولادك .. ورغم المساومات مارضيوش يرجعوا عن طارك .. ضعف الندل وغار .. وهرب وراه الفاسد والزمار .. وبكده بنكرر ونقولك يا بلادى .. يابلد بوي وأهلي وناسي الغاليين .. شعبنا كله فداكى .. واوعي م النهارده تخافي .. بعد الامم كلها ما شافت .. ان المصرى ضحي علشانك لأجلك ولاجل ولادك في ربوعك يعيشوا سالمين .
ولهذا ايها السيدات والسادة ابناء مصر المحترمين أدعوا معايا من القلب :
الله اكبر الله اكبر عليكى يا غاليه الله اكبر الله اكبر عليكى يا نبض الدنيا ليوم الدين .
السلام عليكم
جميل يا شيماء
الله اكبر الله اكبر عليكى يا غاليه
الله اكبر الله اكبر عليكى يا نبض الدنيا
مصر بينا حاجة تانيا
مصر بينا تعلى فى ثانية
مبروك لمصر شعب مصر
إرسال تعليق