الله اكبر 11/2/2011

الله أكبر عليكى يا مصر يا غاليه 
أحنا الثورجيه ولادك ....
صبرنا عشانك التلاتين سنه الماضيه 
صبرنا عشان ...
خوفونا وعمونا واعتقلونا وسحلونا وقيدونا 
بس لما احتجتينا....
الكل كبار وصغار جالك هنا ف ثانيه 
عمونا بالقنابل ...بعد ما صوتنا قوى الحناجر 
ورمونا بالرصاص ...قولنا عشانك مش هنخاف
ولحد ما ندخل قبورنا هنردد الهتاف 
ايوه احنا فداكى يا غاليه 
قتلوا اخويا وضربوا ابويا ...
ودم بناتك مش خساره فيكى ...
دمهم ليكى كان دروع واقيه 
أيوه احنا ولادك وبناتك 
ودم الشهدا فدا ترابك 
أتحدونا وقالوا شباب سيس ..
وقالولنا ان نجاحنا ده كلام تهجيص ...
بس بعد ما طردنا الندل والخسيس....
والمعارض والمؤيد هنا بيهيص ..
جينا نقولك يا بلادى ...شعبنا كله فداكى 
واوعوا تنسوا دم الشهدا 
فقلوبنا النهارده وبكره 
واوعوا م النهارده تخافوا
بعد ما الامم كلها شافوا 
ان المصرى علشان حقه 
بيضحى بحياته 
عايزه الكل يردد الهتاف 
الله اكبر الله اكبر عليكى يا غاليه 
الله اكبر الله اكبر عليكى يا نبض الدنيا 


شيماء الجمال

أرحل يا خسيس 31/1/2011

أرحل يا مبارك يا خسيس 
ياللى الرحمه عندك مفيش 
ارحل مع سوزى وجمال 
على جده ومتجيش 
أرحل او اسقط او اصعد او حتى غور 
المهم عندى انك على مصر تانى متعديش 
أرحل يا ندل يا جبان 
ياللى ضباطك قتلوا الشبان 
وحالولوا يلزقوها فى الاخوان 
ارحل 
ولو بتعايرنا بتاريخك ....
فتاريخك فى خبر كان 
واعرف انك انسان وان اى انسان فان 
أرحل من غير دموع 
وافتكر كل طفل مات م الجوع 
وافتكر كل قلب ام منك موجوع 
وأوعدك 
لا يمكن ترحل وانت بطل 
بعد ما نظامك وحكمك فشل 
واوعدك ترحل وانت مهان 
وتبقى سجين وشعب مصر كله السجان 
أقسملك بدم كل شهيد 
مسلم وقبطى والايد فى الايد 
تتكلبش ايدك فى الحديد 
وتعيش اللى باقى من عمرك شريد 


شيماء الجمال

فجر 4/2/2011 بالتحرير